ಸಸ್ಯವೊಂದು ವಸಾಹತುಶಾಹಿ ಆಗುವುದು ಎಂದರೆ, ಅದೂ ಮತ್ತೊಂದು ದೇಶದಿಂದ ಬಂದು ಬೇರೊಂದು ದೇಶದಲ್ಲಿ! ಹೌದು, ಚೀನಾದ ಮರವೊಂದು ತನ್ನ ಆಕರ್ಷಣೀಯ ಕಾರಣಗಳಿಂದ ಅಮೆರಿಕದ ನೆಲದಲ್ಲಿ ಪರಿಚಯವಾಗಿ, ಅಲ್ಲಿ ದಟ್ಟವಾಗಿ ಬೆಳೆಯುತ್ತಾ ಆಕ್ರಮಣಕಾರಿ ಸಸ್ಯವಾಗಿ ಹೆಸರಾಗಿದೆ. ಅದರ ಆಕರ್ಷಕವಾದ ಸೌಂದರ್ಯದಿಂದ ಹೊಸ ಜಗತ್ತಿಗೆ ಪರಿಚಯವಾಗಿ, ಅಲ್ಲಿ ಮಾತ್ರ ತನ್ನ ವಿಚಿತ್ರವಾದ ಹಬ್ಬುವ ಲಕ್ಷಣಗಳಿಂದ ದಾಳಿಯಿಟ್ಟು ಆಕ್ರಮಣಕಾರಿಯಾಗಿ ಬೆಳೆಯುವ ಮರವೆಂದು ಗುರುತಿಸಲ್ಪಟ್ಟಿದೆ. ಟೆಕ್ಸಾಸ್ ರಾಜ್ಯದ ಹ್ಯೂಸ್ಟನ್ ನಗರ ಪ್ರದೇಶದ ಸುತ್ತ ಮುತ್ತಲಿನ ಒಟ್ಟೂ ಸಸ್ಯರಾಶಿಯಲ್ಲಿ ಇದೊಂದೇ ಪ್ರಭೇದವು ಪ್ರತಿಶತ 25 ರಷ್ಟಾಗಿ ಹಬ್ಬಿದೆ. ಆಕರ್ಷಕವಾದರೂ ಆಕ್ರಮಣಕಾರಿಯಾದ ಮರವನ್ನು ಪರಿಚಯಿಸುವ ಕೌತುಕದ ಕಥನ ಇದು.
ಅಮೆರಿಕೆಗೆ ಬಂದ ಮೊದಲವಾರದ ಒಂದು ಸಂಜೆಯ ವಾಕಿಂಗ್ನಲ್ಲಿ ಮೈತುಂಬಾ ಕ್ರೊಟಾನ್ ಗಿಡದಲ್ಲಿನ -ಬೆಕ್ಕಿನ ಬಾಲದ- ತರಹದ ಹೂಗಳನ್ನು ಇಳಿ ಬಿಟ್ಟ ಮರಗಳು ಕಣ್ಣಿಗೆ ಬಿದ್ದವು. ಅದರ ಎಲೆಗಳು ಮಾತ್ರ ಅಪ್ಪಟ ಅರಳಿ ಮರದ ಎಲೆಗಳ ಹಾಗಿದ್ದು ತಿಳಿ-ಹಸಿರನ್ನು ಹೊದ್ದ ಆ ಮರಗಳು ಆಕರ್ಷಣೀಯವಾಗಿ ಕಂಡವು. ಎಲೆಗಳನ್ನು ಕಿತ್ತು ನೋಡಿದರೆ, ಕಿತ್ತ ಎಲೆಯ ತೊಟ್ಟಿನ ಅಡಿಯಲ್ಲಿ ಹಾಲು ಒಸರಿಸಿ, ಕಳ್ಳಿ ಮುಂತಾದ ಜಾತಿಯ ಯೂಫೊರ್ಬಿಯೇಸಿಯೇ (Euphorbiaceae) ಕುಟುಂಬದ ಮರ ಎಂಬುದಷ್ಟೇ ತಿಳಿಯಿತು. ಅದರ ಸುತ್ತಲೇ ಸುತ್ತುತ್ತಾ, ಅದರ ಕೆಲವು ಚಿತ್ರಗಳನ್ನು ಮೊಬೈಲಿನಲ್ಲಿ ಹಿಡಿದಿಟ್ಟು, ಮನಸ್ಸಿನಲ್ಲಿ ಆಲೋಚಿಸುತ್ತಾ ಮನೆಗೆ ಬಂದೆ.
ಕ್ರೊಟಾನ್ ಪ್ರಭೇದಗಳು ಹೆಚ್ಚಿನವು ಗಿಡಗಳು, ಕೆಲವಷ್ಟೇ ದೊಡ್ಡ ಗಿಡಗಳು ಅಥವಾ ಪೊದೆಗಳು. ಕ್ರೊಟಾನ್ ತರಹದ ಹೂವುಗಳನ್ನೇ ಇಳಿ ಬಿಟ್ಟು ಇದು ಮರ! ಹಿಂದೊಮ್ಮೆ ಎಲ್ಲಿಯೋ ಇಂಡಿಯಾದಲ್ಲೂ ಅಂಹದೇ ಮರವನ್ನು ಕಂಡಿದ್ದರೂ ಎಲ್ಲಿ ಎಂಬುದು ನೆನಪಿಗೆ ಬರಲೇ ಇಲ್ಲ. ಅಂತರ್ಜಾಲದಲ್ಲಿ ಹುಡುಕಾಡಿದಾಗ ಅದು ಚೀನಾದ ಮರವೆಂದು, ಅದರ ಜನಪ್ರಿಯವಾದ ಹೆಸರು ಪಾಪ್ ಕಾರ್ನ್ ಮರವೆಂದೂ, ಅದನ್ನು ಚೀನಾದ ಟ್ಯಾಲೊ ಮರ -Chinese Tallow tree- ಎಂಬುದಾಗಿ ಹೆಸರಿಸಲಾಗಿದೆ ಎಂದು ತಿಳಿಯಿತು. ಸಾಲದಕ್ಕೆ ಚೀನಾದಿಂದ ಹೊರಗೆ ಅದು ಪರಿಚಯಗೊಂಡದ್ದೇ ಈಸ್ಟ್ ಇಂಡಿಯಾ ಕಂಪನಿಯ ಮೂಲಕ ಎಂದೂ ಗೊತ್ತಾಯಿತು. ಅಷ್ಟೇ ಅಲ್ಲ! ಈಸ್ಟ್ ಇಂಡಿಯಾ ಕಂಪನಿಯೇ ಚೀನಾದಿಂದ ಚಹಾವನ್ನೂ ಕದ್ದು ತಂದು ಪರಿಚಯಿಸಿದ ತಿಳಿವು ಇರುವವರಿಗೆ, ಗಿಡ-ಮರಗಳನ್ನು ಪರಿಚಯಿಸುವುದರಲ್ಲಿ ಯೂರೋಪಿಯನ್ನರ ಆಸೆಗಳ ಪರಿಚಯವಿರುತ್ತದೆ.
ಆದರೆ ಅಮೆರಿಕದಲ್ಲಿ ಅದೊಂದು ವಸಾಹತುಶಾಹಿ ಮರವಾಗಿ ತನ್ನ ಇರುವನ್ನು ಅಮೆರಿಕದ ನೆಲದ ಗುಣಕ್ಕೆ ತಕ್ಕುದಾಗಿ ಬೆಳೆಸಿ ದಾಖಲಾಗಿದ್ದು ಅಚ್ಚರಿಯನ್ನು ಮೂಡಿಸಿತು. ಟ್ಯಾಲೊ (Tallow) ಅಥವಾ ಪಾಪ್ ಕಾರ್ನ್ಮರ ಎನ್ನುವುಕ್ಕಾದರೂ ಅಥವಾ ಚೀನಾದಿಂದ ಪರಿಚಯಗೊಳ್ಳಲು ಅದಕ್ಕಿರುವ ಹೆಚ್ಚುಗಾರಿಕೆ ಏನು, ಅಮೆರಿಕದಲ್ಲಿ ದಾಳಿ ಇಡುವ ಮರವಾಗಿರಲು ಅದಕ್ಕಿರುವ ವಿಶೇಷತೆಗಳಾದರೂ ಏನು, ಎಲ್ಲವನ್ನೂ ವಿವರವಾಗಿ ನೋಡೋಣ.
ಅಮೆರಿಕಕ್ಕೆ ಸರಿ ಸುಮಾರು 1772ರಲ್ಲಿ ಬೆಂಜಮಿನ್ ಫ್ರಾಂಕ್ಲಿನ್ (Benjamin Franklin) ಅವರ ಮೂಲಕ ಪರಿಚಯಗೊಂಡಿರುವ ಬಗ್ಗೆ ದಾಖಲೆಗಳು ಹೇಳುತ್ತವೆ. ಅವರಿಗೆ ಬಂದ ಒಂದು ಪತ್ರದಲ್ಲಿ ಆ ಮರದ ಬೀಜಗಳನ್ನು ತರಿಸಿಕೊಂಡ ಅತ್ಯಂತ ಹಳೆಯದಾದ ಆ ದಾಖಲೆಯು ತಿಳಿಸುತ್ತದೆ. ಆದರೆ ಅದು ಅಮೆರಿಕದಲ್ಲಿ ವಸಾಹತುಶಾಹಿಯಾದ ವಿವರಗಳು ಅದನ್ನು ಕುರಿತು ತಿಳಿಯುತ್ತಾ ಹೋದಂತೆ ಅರ್ಥವಾಯಿತು. ಹೌದು, ಅಮೆರಿಕದ ಕೆಲವೊಂದು ಪ್ರದೇಶಗಳಲ್ಲಿ ಅದೊಂದು ರಕ್ಕಸನಂತೆ ಹಬ್ಬುವ ಮರವಾಗಿ ಕಾಡಿದೆ. ಬೆಂಜಮಿನ್ ಫ್ರಾಂಕ್ಲಿನ್ ಅವರಿಂದ ಪರಿಚಯಗೊಂಡ ಕೆಲವೇ ವರ್ಷಗಳಲ್ಲಿ ಅಮೆರಿಕದ ಪೂರ್ವ ತೀರದ ಗುಂಟಾ ಹಬ್ಬತೊಡಗಿತು. ಬಹುಶಃ ಮೊದಲು ಬೆಂಜಮಿನ್ ಫ್ರಾಂಕ್ಲಿನ್ ಅವರ ಪೆನ್ಸಿಲ್ವೇನಿಯಾಕ್ಕೂ ನಂತರ ದಕ್ಷಿಣ ಕರೊಲಿನಾ, ಉತ್ತರ ಕರೊಲಿನಾ ನಂತರ ಟೆಕ್ಸಾಸ್ ಆವರಿಸಿ ಬೆಳೆಯತೊಡಗಿತು. ಟೆಕ್ಸಾಸ್ ರಾಜ್ಯದಲ್ಲಂತೂ “No to Tallow” in the Texas landscape! ಎನ್ನುವವರೆಗೂ ಇದರ ಹಾವಳಿ ಬೆಳೆದಿದೆ. ಹಾಗಾಗಿ ಈ ಟ್ಯಾಲೊ ಮರವನ್ನು “Terrible Tallow” ಎಂದೂ ಕರೆಯುವಂತಾಗಿದೆ. ಹಾಗೇಯೇ ಮುಂದುವರೆದು ಮಧ್ಯ ಅಮೆರಿಕದ ರಾಜ್ಯಗಳಾದ ಆರ್ಕನ್ಸಾ (Arkansas ) ಓಕ್ಲಹಾಮ (Oklahoma) ಗಳನ್ನು ಆವರಿಸುತ್ತಾ ಇತ್ತೀಚೆಗೆ ಪಶ್ಚಿಮದ ಕ್ಯಾಲಿಫೋರ್ನಿಯಾ (California) ರಾಜ್ಯದಲ್ಲೂ ಕಾಣಿಸಿಕೊಂಡಿದೆ.
ಈ ಮರವನ್ನು, ಅಮೆರಿಕವನ್ನು ಆವರಿಸಿರುವ ಬೇರೇ ಖಂಡ-ದೇಶಗಳಿಂದ ಬಂದ ಪ್ರಮುಖ ಹನ್ನೆರಡು ಜೀವಿ-ಪ್ರಭೇದಗಳಲ್ಲಿ ಒಂದು ಎಂಬುದಾಗಿ ಪರಿಗಣಿಸಲಾಗಿದೆ. ಟೆಕ್ಸಾಸ್ ರಾಜ್ಯದ ಅರಣ್ಯ ಇಲಾಖೆಯ ವಾರ್ತಾಪತ್ರವು 2005ರಲ್ಲಿ ನಡೆಸಿದ ದಾಳಿಯಿಡುವ ಹನ್ನೆರಡು ಪ್ರಭೇದಗಳ –Dirty Dozen- ವಿಶೇಷ ಲೇಖನ ಮಾಲೆಗಳ ಸರಣಿಯಲ್ಲಿ ಚೀನಾದ ಈ ಮರವೂ ಒಂದು. ಟೆಕ್ಸಾಸ್ನ ಗೆಲ್ವಿಸ್ಟನ್ ಕೌಂಟಿ (Galveston County) ಒಂದರಲ್ಲೇ 1970ರಲ್ಲಿ ಸುಮಾರು ಕೇವಲ 5-10 ಎಕರೆಗಳ ಅಂದಾಜಿನ ವಿಸ್ತಾರ ಇದ್ದದ್ದು 2000ದ ವೇಳೆಗೆ 30,000 ಎಕರೆಗಳಾಷ್ಟಾಗಿತ್ತು. ಹೀಗೆ ಇದೊಂದೇ ಅಲ್ಲದೆ ಮತ್ತಿತರ ಹಲವು ಆಕ್ರಮಣಕಾರಿ ಗಿಡ-ಮರಗಳ ಹಾವಳಿ ಎಷ್ಟು ಎಂದರೆ ಇಡೀ ಅಮೆರಿಕ ದೇಶದಲ್ಲಿ ಏನಿಲ್ಲವೆಂದರೂ ಹತ್ತು ಕೋಟಿ (100 ದಶಲಕ್ಷ) ಎಕರೆಗಳಷ್ಟು ನೆಲ ಮತ್ತಾವುದೋ ದೇಶದ ನೆಲದಿಂದ ಬಂದ ಗಿಡ-ಮರಗಳಿಗೆ ಆಹುತಿಯಾಗಿದೆ. ಅರಣ್ಯ ಇಕಾಲಜಿಯ ತಜ್ಞರ ಒಂದು ಅಂದಾಜಿನಂತೆ ಇಂತಹಾ ಆಕ್ರಮಣಕಾರಿ ಗಿಡ-ಮರಗಳಿಂದ ಪ್ರತೀ ವರ್ಷ ಅಮೆರಿಕದ ದಿಲಾವರ್ ಎನ್ನುವ ರಾಜ್ಯದ ಎರಡು ಪಟ್ಟು ನೆಲವನ್ನು ಕಳೆದುಕೊಳ್ಳುತ್ತಿದೆಯಂತೆ.
ಇಷ್ಟೆಲ್ಲಾ ಅವಾಂತರದಲ್ಲೂ ಇದರ ಆಕರ್ಷಣೆಯ ಮೆರುಗಿನಲ್ಲಿ ಹಲವಾರು ವಿಶೇಷಣಗಳಿವೆ. ಮೊದಲನೆಯದಾಗಿ ಇದೊಂದು ಸುಂದರವಾದ ಮರ. ಬೇಸಿಗೆಯಿಂದ ಚಳಿಗಾಲಕ್ಕೆ ಬದಲಾಗುವಾಗ ತಿಳಿಹಸಿರಿನ ಎಲೆಗಳು, ಕಂದು ಮಿಶ್ರಿತ ಕೆಂಬಣ್ಣಕ್ಕೆ ತಿರುಗಿ ಅತ್ಯಂತ ಆಕರ್ಷಣೀಯವಾಗಿ ಕಾಣುತ್ತದೆ. ಇದರ ಬೀಜಗಳಂತೂ ಅಪ್ಪಟ ಪಾಪ್-ಕಾರ್ನ್ ತರಹದ ನೋಟದಿಂದ ಗಮನ ಸೆಳೆಯುತ್ತವೆ. ಅಲ್ಲದೆ ತವರು ದೇಶವಾದ ಚೀನಾದಲ್ಲಿ ಏನಿಲ್ಲವೆಂದರೂ ಹತ್ತಾರು ಶತಮಾನಗಳ ಕಾಲ ಮೇಣದ ಬತ್ತಿಗಳ ಹಾಗೂ ಸೋಪು ತಯಾರಿಕೆಯಲ್ಲಿ, ದೀಪಗಳಿಗೆ ಉರುವಲು ಎಣ್ಣೆಯಾಗಿ ಬಳಸಲಾಗಿದೆ. ಟ್ಯಾಲೊ (Tallow) ಎಂದರೇನೇ ಪ್ರಾಣಿಜನ್ಯವಾದ ಕೊಬ್ಬು ಎಂದರ್ಥ! ಬೀಜಗಳನ್ನು ಆವರಿಸಿರುವ ಕೊಬ್ಬು ತೆಗೆದು ಸಂಸ್ಕರಿಸಿ ಎಣ್ಣೆಯನ್ನು ತೆಗೆದು, ಬಣ್ಣ ಮತ್ತಿರ ತಯಾರಿಯಲ್ಲೂ ಉರುವಲಾಗಿಯೂ ಬಳಸಲಾಗುತ್ತದೆ. ಐತಿಹಾಸಿಕವಾದ ದಾಖಲೆಗಳ ಪ್ರಕಾರ ಎರಡನೆಯ ಮಹಾ ಯುದ್ಧದ ಕಾಲದಲ್ಲಿ ಜರ್ಮನಿ-ಜಪಾನ್ ವಿರುದ್ಧ ಒಗ್ಗೂಡಿದ ರಾಷ್ಟ್ರಗಳ ಸೇನೆಗೆ ಡೀಸೆಲ್ಗೆ ಪರ್ಯಾಯವಾದ ಎಮರ್ಜೆನ್ಸಿ ಇಂಧನವಾಗಿತ್ತು. ಇಂಧನದ ಆಸಯೇ ಸಾಕಲ್ಲವೇ ಹಿತವಾದ ಗಿಡವಾಗಲು! ಜೊತೆಗೆ ಸೌಂದರ್ಯವೂ ಜೊತೆಗೂಡಿದರೆ! ಅಲ್ಲವೇ? ಇದೂ ಅಲ್ಲದೆ ಇದು ಬೆಳೆದು ನೆಲೆಯಾಗಲು ಇಂತಹದೇ ಮಣ್ಣು ಬೇಕು ಎಂಬುದಿಲ್ಲ! ಆದರೆ ತುಂಬಾ ನೆರಳು ಇರಬಾರದು ಅಷ್ಟೇ! (ಬಹುಶಃ ಹಾಗಾಗಿ ದಟ್ಟ ಅರಣ್ಯಗಳು ಇದರಿಂದ ಸೇಫ್)
ಇದೇನೇ ಇರಲಿ ಈ ಸಸ್ಯದ ಪೂರ್ವಾಪರಗಳನ್ನು ನೋಡೋಣ. ಈಗಾಗಲೇ ಪ್ರಸ್ತಾಪಿಸಿದಂತೆ ಇದು ಯೂಫೋರ್ಬಿಯೇಸಿಯೇ ಸಸ್ಯ ಕುಟುಂಬಕ್ಕೆ ಸೇರಿದೆ. ಸಸ್ಯವೈಜ್ಞಾನಿಕವಾಗಿ ಇದನ್ನು ಟ್ರಿಯಾಡಿಕ ಸೆಬಿಫೆರಾ (Triadica sebifera) ಎಂದು ಹೆಸರಿಸಲಾಗಿದೆ. ಇದರ ಎಲೆಗಳಂತೂ ಥೇಟ್ ಅರಳಿ ಎಲೆಗಳಂತೆ ಆದರೆ ತುಸು ಚಿಕ್ಕ ಆಕಾರದವು! ಸ್ವಲ್ಪ ಎಣ್ಣೆಯನ್ನು ಸವರಿದಂತೆ (Oily) ಇರುತ್ತವೆ.ಸಸ್ಯವು ಗಂಡು ಮತ್ತು ಹೆಣ್ಣು ಹೂವುಗಳನ್ನು ಬೇರೆ–ಬೇರೆಯಾಗಿ ಆದರೆ ಒಂದೇ ಸಸ್ಯದಲ್ಲಿ ಬಿಡುತ್ತದೆ. ಹೂಗೊಂಚಲು ಸುಮಾರು 20ಸೆಂಮೀ.ವರೆಗೂ ಇದ್ದು ಆಕರ್ಷಣೀಯವಾಗಿ ಒಳ್ಳೆ ಬೆಕ್ಕಿನ ಬಾಲದ ಹಾಗೆ ಇಳಿಬಿದ್ದಂತೆ ಕಾಣುತ್ತದೆ. ವಸಂತ ಕಳೆದರೆ ಈ ಹೂಗೊಂಚಲು ಹಳದಿ ಬಣ್ಣ ಮಿಶ್ರಿತವಾಗಿ ಮತ್ತಷ್ಟು ಆಕರ್ಷಣೀಯವಾಗಿ ಕಾಣುತ್ತವೆ. ಜೂನ್–ಜುಲೈನಲ್ಲಿ ಹೂವುಗಳು ಪರಾಗಸ್ಪರ್ಶಗೊಂಡು ಸೆಪ್ಟೆಂಬರ್ ವೇಳೆಗೆ ಕಾಯಾದಾಗ ಗೊಂಚಲಾಗಿರುತ್ತವೆ. ಹಸಿರು ಕಾಯಿಗಳು ಮಾಗಿದಾಗ ಕಂದು ಮಿಶ್ರಿತ ಕಪ್ಪು ಬಣ್ಣಕ್ಕೆ ತಿರುಗುತ್ತವೆ. ಕಾಯಿಗಳು ಮೂರು ಕವಾಟಗಳಿದ್ದು ಪಾಪ್ ಕಾರ್ನ್ ತರಹದ ಬೀಜಗಳಿಂದ ತುಂಬಿರುತ್ತವೆ. ಇದರ ಬೀಜದಿಂದ ಪಡೆಯಲಾಗುವ ಎಣ್ಣೆಯು ವಿಷಕಾರಿಯಾದರೂ ಬಣ್ಣ ಅಲ್ಲದೆ ಕೆಲವು ಮೇಲ್ಮೈಗಳನ್ನು ಗಾಳಿಗೆ ತೆರೆದ ಕೂಡಲೇ ಗಟ್ಟಿಯಾಗುವಂತೆ ಮಾಡುವ ಸಲುವಾದ ಬಳಕೆಯಲ್ಲಿ ಉಪಯೋಗಕಾರಿ. ಬೀಜಗಳನ್ನು ಸುತ್ತುವರಿದ ಏರಿಲ್ (Aril) ಬಿಳಿಯ ಬಣ್ಣದ ಮೇಣದಂತಿರುವುದರಿಂದ ಸೋಪಿನ ತಯಾರಿಕೆಯಲ್ಲಿ ಉಪಯೋಗಿಸಲಾಗುತ್ತದೆ.
ಬೇಗನೇ ಬೆಳೆಯುವ ಇದು ನಾಟಿಯಾದ 3-4 ವರ್ಷಗಳಲ್ಲಿ ಮರವು 20-30 ಅಡಿಗಳಷ್ಟು ಬೆಳೆದು ಪ್ರಬುದ್ಧಮಾನಕ್ಕೆ ಬಂದು ಬೀಜೋತ್ಪಾದನೆಯಲ್ಲಿ ತೊಡಗುತ್ತದೆ. ಒಂದೇ ಮರ ಸುಮಾರು ಲಕ್ಷದ ಹತ್ತಿರ ಬೀಜಗಳನ್ನು ಉತ್ಪಾದಿಸುತ್ತದೆ. ಈ ಬೀಜಗಳೋ ನೀರು-ಗಾಳಿಯಿಂದ ಪ್ರಸಾರಗೊಂಡು ನೆಲ ಸಿಕ್ಕರೆ ಸಾಕು! ವರ್ಷಗಟ್ಟಲೇ ಕಾದು ಆದರೂ ಮೊಳಕೆಯೊಡೆದು ಸಸಿಯಗುತ್ತವೆ. ಹಾಗಾಗಿ ಒಂದೇ ಗಿಡ/ಮರ ಸಹಸ್ರಾರು ಸಸಿಗಳನ್ನು ನಾಟಿಗೆ ಅಣಿಮಾಡಿ ಆಕ್ರಮಣಕಾರಿಯಾಗಲು ನೆರವಾಗಿದೆ. ಇದರಿಂದ ಒಸರುವ ಮಿಲ್ಕಿ ಲೇಟೆಕ್ಸ್ –ಹಾಲಿನಂತಹಾ ರಸ– ವಿಷಕಾರಿ. ಇದರಲ್ಲಿ ಚೀನಿಯರು ತಮ್ಮದೇ ಚಿಕಿತ್ಸೆಗಳಲ್ಲಿ ಔಷಧಗಳನ್ನು ಕಂಡುಕೊಂಡಿದ್ದಾರೆ. ಎಲೆಗಳೂ ಉದುರಿ ಕೊಳೆಯುವಾಗ ಕೆಲವೊಂದು ಸಸ್ಯಗಳಿಗೆ ಹಾನಿಕಾರಕವಾಗಿ ಸಸ್ಯ ಇಕಾಲಜಿಯಲ್ಲಿ ವ್ಯತ್ಯಯವನ್ನು ಉಂಟುಮಾಡುತ್ತದೆ.
ಇಂತಹಾ ಗಿಡಕ್ಕೆ 7ನೆಯ ಶತಮಾನದಲ್ಲಿ ಚೀನಾದ ತಾಂಗ್ ರಾಜಮನೆತನದ ಗೌರವವು ದಕ್ಕಿದೆ. ಈ ಸಸ್ಯವುಯ ಚೀನಾದ ಪೂರ್ವ ತೀರದ ಜೆಜಾಂಗ್ (Zhejiang) ಪ್ರದೇಶದ ಮೂಲ ನೆಲೆಯಾಗಿದ್ದು ತಾಂಗ್ ಔಷಧೀಯ ಪದ್ಧತಿಯ ದಾಖಲಾತಿಯಾದ ಶಿನ್ ಶ್ಯೂ ಬೆನ್ತ್ಸಾ (Xinxiu bencao) ದಲ್ಲೂ ಈ ಸಸ್ಯದ ಔಷಧೀಯ ಪ್ರಸ್ತಾಪಗಳಿವೆ. ಹಾಗಾಗಿ ಈ ಮರವನ್ನು ನೆಡಲು, ಬೆಳೆಸಲು 7ನೆಯ ಶತಮಾನದಲ್ಲಿ ನೆರವು ಸಿಕ್ಕಿದೆ. ಮುಂದೆ 17ನೆಯ ಶತಮಾನದ ವೇಳೆಗೆ ಫಿಲಿಪೈನ್ಸ್ ಥೈವಾನ್, ವಿಯಟ್ನಾಂ ಜಪಾನ್ ಮುಂತಾದ ದೇಶಗಳಿಗೂ ಪರಿಚಯವಾಗಿತ್ತು. 18ನೆಯ ಶತಮಾನದಲ್ಲಿ ಈಸ್ಟ್ ಇಂಡಿಯಾ ಕಂಪನಿಯ ಆಸಕ್ತಿಯಿಂದ ಭಾರತವೇ ಮೊದಲ್ಗೊಂಡು ಯೂರೋಪಿಗೂ ನಂತರದಲ್ಲಿ ಅಮೆರಿಕಕ್ಕೂ ಪರಿಚಯಗೊಂಡು ನೆಲೆಯನ್ನು ಕಂಡಿತು.
ಪ್ರಸ್ತುತ ಪಾಪ್ ಕಾರ್ನ್ ಮರವು ತನ್ನ ಮೂಲ ತವರಿನ ಇಕಾಲಜಿಯಲ್ಲಿ ಯಾವುದೇ ತಕರಾರನ್ನು ಹುಟ್ಟಿ ಹಾಕಿಲ್ಲ. ಆದರೆ ಹೋದ ಕಡೆ, ಅದರಲ್ಲೂ ಅಮೆರಿಕದಲ್ಲಿ ಮತ್ತು ಆಫ್ರಿಕಾದಲ್ಲೂ ಕೆಲವೆಡೆಗಳಲ್ಲಿ ಆಕ್ರಮಣಕಾರಿಯಾಗಿದೆ. ಅಮೆರಿಕವಂತೂ ಮೊದಲೇ ವಸಾಹತುಗಾರರ ಕಾಲೋನಿ, ಅಲ್ಲಿನ ನೆಲವೇ ಆ ಗುಣದ್ದೇನೋ ಎನ್ನುವಂತೆ ಭಯಂಕರ ವಸಾಹತುಶಾಹಿಯಾದ ಮರವಾಗಿದೆ. ಇದನ್ನು ಹದ್ದು ಬಸ್ತಿನಲ್ಲಿಡಲು ಟೆಕ್ಸಾಸ್ನ ಅರಣ್ಯ ಇಲಾಖೆಯು ಇನ್ನಿಲ್ಲದ ಪ್ರಯತ್ನ ಮಾಡುತ್ತಿದೆ. ಎಕೆರೆಗೆ ನೂರಾರು ಡಾಲರ್ಗಳ ಔಷಧಿಯನ್ನು ಸುರಿಯುತ್ತಿದೆ. ಮರವು ಕವಲೊಡೆವ ಮೂಲ ಕಾಂಡದಲ್ಲಿ ತೊಗಟೆಯನ್ನು ಕೆತ್ತಿ ತೆಗೆದು ಆ ಜಾಗದಲ್ಲಿ ಕಳೆನಾಶಕ ಔಷಧವನ್ನು ಸಿಂಪಡಿಸುವುದು ಉತ್ತಮ ಪರಿಹಾರವಾಗಿ ಕಾಣುತ್ತಿದೆ. 1990ರ ದಶಕದಲ್ಲಿ ತಾನಾಗಿಯೇ ಅಲಂಕಾರಿಕ ಮರವಾಗಿ ಅಲ್ಲಲ್ಲಿ ಪರಿಚಯಿಸಿ, ತಲೆನೋವನ್ನು ತಂದುಕೊಂಡಿದೆ.
ಕಳೆದ ವಾರ ಬೆಂಗಳೂರಿನಿಂದ ಅಮೆರಿಕೆಗೆ ಹೊರಟು ನಿಂತಾಗ ಸಸ್ಯಯಾನದ ಪರಿಚಯವಿದ್ದ ನನ್ನ ಆಪ್ತ ಗೆಳೆಯ-ಗೆಳತಿಯರು ಅಲ್ಲಿಯೂ ಮರ ಸುತ್ತುಸುತ್ತೀಯಾ? ಎಂದು ಬೀಳ್ಕೊಡುವ ಶುಭಾಶಯಗಳಲ್ಲಿ ಸೇರಿಸಿದ್ದರು. ಅವರ ನೆನಪುಗಳಿಗೆ ಉತ್ತರಿಸಲು ಬರು-ಬರುತ್ತಲೇ ಸ್ಥಳಿಯತೆಗೆ ಭಂಗ ತರುವಂತಹಾ ಮರವೊಂದು ಪರಿಚಯವಾಗಬೇಕೇ? ಆದರೇನಂತೆ ಇದ್ದಿಲು, ಎಥೆನಾಲ್ ಮತ್ತು ಜೈವಿಕ ಇಂಧನಗಳಲ್ಲಿ ಬಳಕೆಯಾಗುವ ಇದು ಆಧುನಿಕತೆಯ ಬೆಳಕಿಗೆ ಒಂದಷ್ಟು ನೆರವು ನೀಡುತ್ತಿದೆ. ಜೊತೆಗೆ ಇದರ ಮೈತುಂಬಾ ಹೂಗೊಂಚಲು ಇರುವುದರಿಂದ ಜೇನು ಕೃಷಿಕಾರರಿಗೆ ಇದು ಉತ್ತೇಜಕವಾಗಿದ್ದು ಪರಿಮಳಯುಕ್ತ ಜೇನುತುಪ್ಪವನ್ನೂ ನೀಡುತ್ತಿದೆ.
ನಮಸ್ಕಾರ
ಡಾ. ಟಿ.ಎಸ್. ಚನ್ನೇಶ್
ಹೆಚ್ಚಿನ ಓದಿಗೆ:
