ಅಮೆರಿಕೆಯಲ್ಲಿ ಇದ್ದ ನಾಲ್ಕು ತಿಂಗಳ ಕಡೆಯಲ್ಲಿ ಭೇಟಿಯಿತ್ತ ಸ್ಥಳ, ಅಲಬಾಮಾದ ರಾಜಧಾನಿ ಮಂಟ್ಗಾಮರಿಯ ಚಾರಿತ್ರಿಕವಾದ “ಕ್ಯಾಪಿಟಲ್” ಮ್ಯೂಸಿಯಂ. ಅದರ ಆವರಣದಲ್ಲಿ MOON TREE ಎಂಬ ಫಲಕ ಹೊತ್ತ ಒಂದು ಪೈನ್ ಮರ ಕಂಡಿತ್ತು. ಅಪೊಲೊ-14ರ ಚಂದ್ರಯಾನದಲ್ಲಿ ಸಾಗಿ, ವಾಪಸ್ ಭೂಮಿಗೆ ಬಂದ ಬೀಜದಿಂದ ಹುಟ್ಟಿದ ಮರವದು. ಚಂದ್ರಯಾನಿ ಮರವನ್ನು ಕಂಡ ಸಂತಸದಲ್ಲಿ ತೆಗೆದುಕೊಂಡ ಚಿತ್ರಗಳು ಈಗ NASA ವೆಬ್ಸೈಟ್ ಸೇರಿವೆ. ಸಸ್ಯಯಾನದ ಕುತೂಹಲದಲ್ಲಿ ಸಿಕ್ಕ ಚಾರಿತ್ರಿಕ ಫಲ ಅದು.
ಮಂಟ್ಗಾಮರಿಯಲ್ಲಿ ಕ್ಲಿಕ್ಕಿಸಿದ ಚಂದ್ರಯಾನಿ ಪೈನ್ ಮರದ ಚಿತ್ರಗಳು NASAದ ಆರ್ಕೈವ್ನ ವೆಬ್ಸೈಟ್ ಅನ್ನು ಸೇರಿದ ವಿವರಗಳ ಜೊತೆಗೆ ಅಪೊಲೊ-14 ಯಾತ್ರೆಯ MOON TREE ಕಥನಗಳ ಸ್ಥೂಲವಾದ ವಿವರಣೆಗಳನ್ನು CPUS ಓದುಗರಲ್ಲಿ ಹಂಚಿಕೊಳ್ಳುತ್ತಿರುವೆ. ಈ ಮರವನ್ನು ಸಸಿಯಾಗಿದ್ದಾಗ 1976ರ ಏಪ್ರಿಲ್ ನಲ್ಲಿ ನೆಡಲಾಗಿತ್ತು.
ಕಳೆದ 2019ರಿಂದಲೂ CPUSನ ಸಸ್ಯಯಾನದಲ್ಲಿ ಗಿಡ-ಮರಗಳ ಹಿಂದೆ ಓಡುವ ಮನಸ್ಸಿಗೆ, ನಿರಂತರವಾಗಿ ವರ್ಷಗಟ್ಟಲೆ ಸುಖಾನುಭವದ ಬೆಂಬಲ ಸಿಕ್ಕಿದೆ. ಹಾಗೆಂದೇ ಅಲಬಾಮಾದ ಮಂಟ್ಗಾಮರಿಯಲ್ಲಿ Moon Tree ಎಂಬ ಫಲಕ ಕಂಡೊಡನೆ ಕುತೂಹಲವು ನೂರ್ಮಡಿಯಾಗಿ ವಿವರಗಳಿಗೆ ವೆಬ್ ಪುಟಗಳಲ್ಲಿ ಹುಡುಕಾಡಿದಾಗ ಪ್ರಸ್ತುತ MOON TREEಯ NASAದ ಆರ್ಕೈವ್ನ ಉಸ್ತುವಾರಿ ವಿಜ್ಞಾನಿ ಡೇವಿಡ್ ವಿಲಿಯಮ್ಸ್ ಅವರ ಸಂಪರ್ಕ ಸಿಕ್ಕಿತು. ನಾನು ತೆಗೆದ ಫೊಟೊಗಳನ್ನು ಮತ್ತು ನನ್ನ ಸಸ್ಯ ವಿಜ್ಞಾನದ ಆಸಕ್ತಿಯನ್ನು ಅವರ ಜೊತೆ ಹಂಚಿಕೊಂಡೆ. ಆಗ ಅವರಿಗೆ ಇತ್ತೀಚೆಗಿನ ಮಂಟ್ಗಾಮರಿಯ ಮೂನ್ ಟ್ರೀ – ಪೈನ್ ಮರ-ದ ಚಿತ್ರಗಳು ಸಿಕ್ಕ ಖುಷಿಯನ್ನು ಅವರು ಹಂಚಿಕೊಂಡದ್ದು ಮಾತ್ರವಲ್ಲದೆ, ನಾನು ಕಳಿಸಿದ್ದ ಫೋಟೊಗಳ ಮಾಂಟೇಜನ್ನು ನಾಸಾ ವೆಬ್ಪುಟದಲ್ಲಿ ಬಳಸಲು ನನ್ನ ಅನುಮತಿಯನ್ನೂ ಕೇಳಿದ್ದರು. ಇದೀಗ NASAದ ಬಾಹ್ಯಾಕಾಶ ವಿಜ್ಞಾನ ದತ್ತಾಂಶಗಳ ಸಂಯೋಜಿತ ಆರ್ಕೈವ್- ಎನ್ಎಸ್ಡಿಸಿಎ(NSDCA – NASA Space Science Data Coordinated Archive) ವೆವ್ಸೈಟಿನಲ್ಲಿರುವ Moon Treeಗಳ ವಿವರಗಳಲ್ಲಿ, ಮಂಟ್ಗಾಮರಿಯ ಪೈನ್ ಮರದ ಪುಟದಲ್ಲಿ ಹಾಕಿದ್ದಾರೆ. ಪುಟದ ಅಡಿಯಲ್ಲಿ ಫೋಟೊ ಕಳಿಸಿದ್ದಕ್ಕೆ ಕ್ರೆಡಿಟ್ ಕೂಡ ಕೊಟ್ಟಿದ್ದಾರೆ. ( ವೆಬ್ ಪುಟದ ಚಿತ್ರ ಕೆಳಗಿದೆ, ಬಾಕ್ಸ್ ಅನ್ನು ನೋಡಿ, ಮತ್ತು ಅದರ ಲಿಂಕ್
https://nssdc.gsfc.nasa.gov/planetary/lunar/moon_trees/montgomery_al_tree.html )
ಸಸ್ಯಗಳೊಡನಾಟದ ಕುತೂಹಲದ ಯಾತ್ರೆಯಲ್ಲಿ ಮೊದಲ ಪಾಠಗಳನ್ನು ಮಾಡಿದ್ದ ನನ್ನ ಸಸ್ಯವಿಜ್ಞಾನದ ಗುರುಗಳಾದ ಡಾ. ಸತ್ಯವತಿಯವರು ಈಗಿದ್ದಿದ್ದರೆ, ನಿಜಕ್ಕೂ ಬಹಳ ಸಂತೋಷ ಪಡುತ್ತಿದ್ದರು. Moon Treeಗಳ ಪರಿಕಲ್ಪನೆಯ ಮೂಲ ಕಾರಣರಾದ ಅಮೆರಿಕಾದ ಫಾರೆಸ್ಟ್ ವಿಭಾಗದ ಮುಖ್ಯಸ್ಥರಾಗಿದ್ದ ಎಡ್ವರ್ಡ್ ಕ್ಲಿಫ್ (Edward P. Cliff ) ಅವರೂ, ಚಂದ್ರಯಾನಕ್ಕೆ 6 ಅಂಗುಲದ ಡಬ್ಬಿಯಲ್ಲಿ ಬೀಜಗಳನ್ನು ಕೊಂಡೊಯ್ದು ವಾಪಸ್ ಭೂಮಿಗೆ ತಂದು ನೂರಾರು ಚಂದ್ರಯಾನಿ ಮರಗಳಿಗೆ ಕಾರಣರಾಗಿದ್ದ ವ್ಯೋಮಯಾನಿ ಫಾರೆಸ್ಟರ್ ಸ್ಟಾಟ್ ರೂಸ (Stuart Roosa) ಅವರೂ ಸ್ವರ್ಗಸ್ಥರಾಗಿರುವ ಈ ಹೊತ್ತಿನಲ್ಲಿ ಬದುಕುಳಿದಿರುವ 60ಕ್ಕೂ ಹೆಚ್ಚಿನ ಚಂದ್ರಯಾನಿ ಮರಗಳು, ವಿಜ್ಞಾನಿಗಳ ಕುತೂಹಲದ ಜೀವಂತಿಕೆಗೆ ಸಾಕ್ಷಿಯಾಗಿವೆ. ಇಡೀ ಯೋಜನೆಯ ವಿವರಗಳನ್ನು ಭಾಗವಹಿಸಿದ ಮರಗಳನ್ನು, ಕಾರಣರಾದ ವಿಜ್ಞಾನಿಗಳ ಕುರಿತು ಮುಂದೆ ನೋಡೋಣ.
ಅಪೊಲೊ-14 ರ ಚಂದ್ರಯಾನ ಮತ್ತು ಕೊಂಡೊಯ್ದ Moon Tree ಬೀಜಗಳು
ಅಪೊಲೊ-14, 1971ರಲ್ಲಿ ನಾಸಾವು ಯಶಸ್ವಿಯಾಗಿ ಚಂದ್ರನ ಮೇಲೆ ಇಳಿದ ಮೂರನೆಯ ಯಾತ್ರೆ ಮತ್ತು ವ್ಯೋಮಯಾನಿಗಳನ್ನು ಒಳಗೊಂಡ 9ನೆಯ ವ್ಯೋಮ ನೌಕೆ. ಇದರ ಯಾನದ ಅವಧಿ ಒಟ್ಟು 9 ದಿನಗಳು ಇದರಲ್ಲಿ ಮೂವರು ಗಗನಯಾನಿಗಳಿದ್ದರು. ಅಲನ್ ಶೆಫರ್ಡ್ (Alan Shepard) ಮತ್ತು ಎಡ್ಗರ್ ಮಿಶೆಲ್ (Edgar Mitchell) ಚಂದ್ರನ ಮೇಲೆ ಇಳಿದರೆ, ಸ್ಟಾಟ್ ರೂಸ (Stuart Roosa) ಅವರು ಚಂದ್ರನ ಮೇಲೆ ಇಳಿಯದೆ ಚಂದ್ರನ ಸುತ್ತುವ ನೌಕೆಯಲ್ಲಿ ಸುಮಾರು ಒಂದೂವರೆ ದಿನ 34 ಬಾರಿ ಸುತ್ತಿದ್ದರು.
ಚಂದ್ರಯಾನಿ ಮರ (Moon Tree) ಗಳ ಪರಿಕಲ್ಪನೆಯು ಮೂಲತಃ 1962ರಿಂದ 72ರ ನಡುವೆ ಅಮೆರಿಕದ ಫಾರೆಸ್ಟ್ ಸರ್ವೀಸ್ನ ಮುಖ್ಯಸ್ಥರಾಗಿದ್ದ ಎಡ್ವರ್ಡ್ ಕ್ಲಿಫ್ ಅವರದ್ದು. ಅವರ ಮಾತಿನಂತೆಯೇ ಇದೊಂದು ಕೇವಲ ಬೀಜಗಳ ಮೇಲೆ ಬಾಹ್ಯಾಕಾಶದ ಪರಿಣಾಮಗಳ ಕುತೂಹಲದಿಂದ ಹುಟ್ಟಿದ್ದು! ಜೊತೆಗೆ ಸಾಮಾನ್ಯವಾಗಿ ಎಲ್ಲಾ ಬೀಜಗಳ ಮೊಳೆಕೆಗಳು ಅಥವಾ ಮೊಳಕೆಯೊಡೆಯುವ ಭಾಗವು ಗುರುತ್ವದ ಕಡೆಗೆ ಇರುತ್ತದೆ. ಹೀಗೆ ವ್ಯೋಮಕ್ಕೆ ಸಾಗುವಾಗ ಗುರುತ್ವದ ವಿರುದ್ಧ ಚಲಿಸುವ ಅಲ್ಲದೆ ಬಾಹ್ಯಾಕಾಶದಲ್ಲಿ ಗುರುತ್ವದ ಪರಿಣಾಮವಿಲ್ಲದಾಗ ಬೀಜದ ಮೊಳಕೆಯ ಹಾಗೂ ನಂತರದ ಸಸ್ಯಗಳ ಮೇಲಾಗುವ ಪರಿಣಾಮವನ್ನು ಅರಿಯುವ ಉದ್ದೇಶವಿತ್ತಷ್ಟೆ.
ಈ ಪರಿಕಲ್ಪನೆಯನ್ನು ಪ್ರಾಯೋಗಿಕವಾಗಿ ಸಾಧ್ಯ ಮಾಡಿದ್ದು ವ್ಯೋಮಯಾನಿ ಸ್ಟಾಟ್ ರೂಸ (Stuart Roosa) ಅವರು. ಸ್ಟಾಟ್ ರೂಸ ಮೊದಲು ಓರ್ವ ಫಾರೆಸ್ಟ್ ಫೈರ್ ಫೈಟರ್. ಅರಣ್ಯದಲ್ಲಿ ಬೆಂಕಿ ಅನಾಹುತಗಳಾದಾಗ ಪ್ಯಾರಾಚೂಟ್ ನಿಂದ ಹಾರಿ ಬೆಂಕಿ ಎದುರಿಸುವ ಸಾಹಸದ ಕೆಲಸಕ್ಕೆ ಹೆಸರಾದ ವ್ಯಕ್ತಿ ಮುಂದೆ, ಏರ್ ಫೋರ್ಸ್ ಸೇರಿ ಪೈಲೆಟ್ ಆಗಿ ಕಾರ್ಯನಿರ್ವಹಿಸಿದವರು. ಎಡ್ವರ್ಡ್ ಕ್ಲಿಫ್ ಅವರಿಗೆ ಹೀಗೆ ಚಂದ್ರಯಾನ ಮಾಡಿಸುವ ಊಹೆ ಹೊಳೆದಾಗ ಅವರಿಗೆ ಪರಿಚಿತರಾಗಿದ್ದ ರೂಸ ನೆನಪಿಗೆ ಬಂದರು. ಆಗಲೇ ನಾಸಾದಲ್ಲಿ ವ್ಯೋಮಯಾನದ ಸಹಾಯಕ ತಾಂತ್ರಿಕತೆಯಲ್ಲಿದ್ದ ಅವರನ್ನು ಅಪೊಲೊ-14 ರ ತಂಡದಲ್ಲಿ ಒಬ್ಬರಾಗಿದ್ದಾಗ ಅವರನ್ನು ಚಂದ್ರಯಾನಿ ಮರ (Moon Tree) ಗಳ ಪರೀಕ್ಷೆಗಳಲ್ಲಿ ಮುಂದಾಳುವಾಗಿಸಿದರು. ರೂಸ ತಮ್ಮೆಲ್ಲಾ ಸ್ವಂತ ಸಾಮಗ್ರಿಗಳ ಜೊತೆಗೆ ಕೇವಲ 6 ಅಂಗುಲದ ಲೋಹದ ಡಬ್ಬಿಯೊಂದರಲ್ಲಿ ಸುಮಾರು 5 ಪ್ರಭೇದಗಳ 400-500 ಬೀಜಗಳನ್ನು ಕೊಂಡೊಯ್ದಿದ್ದರು.
ಸ್ಟಾರ್ಟ್ ರೂಸ ಅವರು ತಮ್ಮೊಡನೆ ಕೊಂಡೊಯ್ದ ಐದೂ ಪ್ರಭೇದಗಳು ಅಮೆರಿಕದ ಖ್ಯಾತ ಸ್ಥಳೀಯ ಮರಗಳಾಗಿವೆ. ಅತ್ಯಂತ ಎತ್ತರದ ಖ್ಯಾತಿಯುಳ್ಳ ಅಮೆರಿಕನ್ ರೆಡ್ ವುಡ್ ಟ್ರೀ (Red Wood Tree) ಇದು ಕುಪ್ರೆಸಿಯೇಸಿಯೇ ಕುಟುಂಬದ Sequoia sempervirens ಸಸ್ಯವೈಜ್ಞಾನಿಕ ಹೆಸರಿನ ಪ್ರಭೇದ. ಪೈನೇಸಿಯೇ (Pinaceae) ಕುಟುಂಬದ ಲಾಬ್ಲಲೀ ಪೈನ್ Loblolly Pine ಇದರ ಸಸ್ಯ ವೈಜ್ಞಾನಿಕ ನಾಮಧೇಯ Pinus taeda. ಮೂರನೆಯದು ಪ್ಲಾಂಟನೇಸಿಯೇ (Plantanaceae) ಕುಟುಂಬದ Platanus occidentalis ವೈಜ್ಞಾನಿಕ ಹೆಸರಿನ ಸಿಕಮೊರ್ ಮರ (Sycamore Trees). ಮತ್ತೊಂದು ಸಹಾ ಪೈನೇಸಿಯೇ ಕುಟುಂಬದ Pseudotsuga menziesii ಸಸ್ಯವೈಜ್ಞಾನಿಕ ಹೆಸರಿನ ಪ್ರಭೇದ Douglas fir! ಐದನೆಯ ಹಾಗೂ ಕಡೆಯ ಪ್ರಭೇದ ಸಿಹಿ ಅಂಟಿನ ಮರ (Sweet Gum Trees). ಇದರ ಸಸ್ಯವೈಜ್ಞಾನಿಕ ಹೆಸರು Liquidambar styraciflua ಇದು ಅಲ್ಟಿಂಗಎಸಿಯೇ (Altingiaceae) ಕುಟುಂಬದ ಸಸ್ಯ.
ಹೀಗೆ ಸುಮಾರು 5 ಪ್ರಭೇದಗಳ ಸರಿ ಸುಮಾರು 500 ಬೀಜಗಳನ್ನು ಒಂದು ಡಬ್ಬಿಯಲ್ಲಿ ರೂಸ ಗಗನಯಾನಕ್ಕೆ ತೆಗೆದುಕೊಂಡು ಹೋಗಿ ವಾಪಸ್ಸು ಬಂದ ನಂತರ ಅವುಗಳನ್ನು ಸಸಿ ಮಡಿಯಲ್ಲಿ ಬೆಳೆಸಲು ಅಮೆರಿಕಾ ಅರಣ್ಯ ಇಲಾಖೆಯು ಪ್ರಯೋಗ ನಡೆಸಿತು. ಸುಮಾರು 450 ಬೀಜಗಳು ಮಾತ್ರವೇ ಮೊಳಕೆಯೊಡೆದು 400ರ ಆಸುಪಾಸಿನ ಸಂಖ್ಯೆಯ ಸಸಿಗಳಾಗಿದ್ದವು. ನಂತರದಲ್ಲಿ ಅವುಗಳನ್ನು ಅಮೆರಿಕಾದ ನೂರಾರು ಪ್ರಮುಖವಾದ ಸ್ಥಳಗಳಲ್ಲಿ 1975 ಮತ್ತು 1978ರ ನಡುವೆ ನಾಟಿ ಮಾಡಲಾಗಿತ್ತು. ಎಲ್ಲಾ ಸಸ್ಯಗಳ ನಾಟಿಯನ್ನು 1976ರ ಅಮೆರಿಕದ 200ನೆಯ ಸ್ವಾತಂತ್ರೋತ್ಸವದ ನೆನಪಿಗೆಂದು ದೇಶಾದ್ಯಂತ ಅನೇಕ ಸ್ಥಳಗಳಲ್ಲಿ ಸಾಮಾನ್ಯವಾಗಿ ವಿಶ್ವವಿದ್ಯಾಲಯದ ಕ್ಯಾಂಪಸ್, ಚಾರಿತ್ರಿಕ ಸ್ಥಳಗಳು, ಗ್ರಂಥಾಲಯಗಳ ಹತ್ತಿರ, ಶಾಲಾ ಕಾಲೇಜುಗಳ ಆವರಣ ಹೀಗೆ ಗೊತ್ತಾದ ಸ್ಥಳಗಳಲ್ಲೇ ನೆಡಲಾಗಿತ್ತು. ಬಹುಶಃ ಆ ದಿನಗಳ ನಂತರ ಮುಂದೆ 2022ರಲ್ಲಿ ಮಾತ್ರವೇ ಮತ್ತೆ ಇಂತಹದ್ದೇ ಪ್ರಯೋಗ ನಡೆಸುವವರೆಗೂ ಅಷ್ಟೇನೂ ಮಹತ್ವದ ಸಂಗತಿಗಳು ಹೊರ ಬಿದ್ದಂತೆ ಜನಪ್ರಿಯ ಮಾಧ್ಯಮಗಳಲ್ಲಂತೂ ಕಾಣುವುದಿಲ್ಲ. ಬಹುಶಃ ಅಂತಹ ಮಹತ್ವದ ಪರಿಣಾಮಗಳು ದಾಖಲಾಗದ್ದೂ ಇರಬಹುದು. ಎಡ್ವರ್ಡ್ ಕ್ಲಿಫ್ ಹೇಳಿದಂತೆ ಅದೊಂದು ಜನಪ್ರಿಯ ಕುತೂಹಲ ಅಷ್ಟೇ!
ಮಂಟ್ಗಾಮರಿಯಲ್ಲಿ ಕಂಡದ್ದು Loblolly Pine ಮರ
ಮಂಟ್ಗಾಮರಿಯು ಅಮೆರಿಕದ ಅಲಬಾಮಾ ರಾಜ್ಯದ ರಾಜಧಾನಿ. ಜೊತೆಗೆ ಅಮೆರಿಕಾದ ಆಂತರಿಕ ಯುದ್ಧಗಳ ಸಮಯದಲ್ಲಿ 1861 ರಲ್ಲಿ ಗುಲಾಮಗಿರಿಯ ಬೇಕು-ಬೇಡಗಳ ವೈರುಧ್ಯದ ಸಂಗತಿಗಳಿಂದ ಗುಲಾಮಗಿರಿಯ ಪರವಾಗಿದ್ದ 11 ರಾಜ್ಯಗಳು ಒಂದು ಒಕ್ಕೂಟ ರಚಿಸಿಕೊಂಡು ಹೊರ ಬಂದು ಮಂಟ್ಗಾಮರಿಯನ್ನು ರಾಜಧಾನಿಯಾಗಿ ಮಾಡಿಕೊಂಡಿದ್ದವು. ಆಗ ಅದರ ಕೇಂದ್ರವಾಗಿದ್ದ ಕಟ್ಟಡ “ಕ್ಯಾಪಿಟಲ್”. ನಂತರ 1965ರ ಆಫ್ರಿಕನ್ ಅಮೆರಿಕನ್ನರ ಓಟು ಮಾಡುವ ಹಕ್ಕು ಪಡೆಯುವ ಚಳುವಳಿಯ ಮುಕ್ತಾಯ ಸಮಯದ ಘಟನೆಯೂ ಇದೇ ಕ್ಯಾಪಿಟಲ್ ಆವರಣದಲ್ಲೇ ನಡೆದಿತ್ತು. ಮಾರ್ಟಿನ್ ಲೂಥರ್ ಕಿಂಗ್ ಜೂ. ಇದರ ಮುಂದಾಳತ್ವ ವಹಿಸಿದ್ದರು. ಇಂತಹಾ ಚಾರಿತ್ರಿಕ ಮಹತ್ವದ ಮಂಟ್ಗಾಮರಿಯ ಕ್ಯಾಪಿಟಲ್ ಮ್ಯೂಸಿಯಂನ ಆವರಣದಲ್ಲಿ ನನಗೆ ಕಂಡದ್ದು ಲಾಬ್ಲಲೀ ಪೈನ್ ಮರ.
ಲಾಬ್ಲಲೀ ಪೈನ್ (Loblolly Pine) ಮರವು ಅಮೆರಿಕಾ ಅರಣ್ಯ ಸರ್ವೇಕ್ಷಣಾ ವರದಿಯ ಪ್ರಕಾರ ಅಮೆರಿಕದಲ್ಲಿ ಕೆಂಪು ಮೆಪಲ್ (Red Maple) ಮರದ ನಂತರ ಹೆಚ್ಚಾಗಿ ಕಂಡು ಬರುವ ಮರವಾಗಿದೆ. ಅಲ್ಲದೆ ಅಮೆರಿಕಾದ ಒಂದು ರಾಜ್ಯವಾದ ಅರ್ಕನ್ಸಸ್ (Arkansas)ನ ರಾಜ್ಯದ ಮರವೆಂದೂ ಗುರುತಿಲ್ಪಟ್ಟಿದೆ. ನೂರಾರು ಅಡಿಗಳ ಎತ್ತರಕ್ಕೆ ಬೆಳೆಯಬಲ್ಲ ಈ ಪೈನ್ ಮಂಟ್ಗಾಮರಿಯಲ್ಲೂ ಸಾಕಷ್ಟೇ ಎತ್ತರವಾಗಿದ್ದು, ಒಂದೇ ಚಿತ್ರದಲ್ಲಿ ಫೋಟೊ ತೆಗೆಯಲು ಬಾರದಷ್ಟು ಎತ್ತರಕ್ಕೆ ಬೆಳೆದಿತ್ತು.
ಸದ್ಯಕ್ಕೆ 2000ದ ನಂತರವೇ ಚಂದ್ರಯಾನಿ ಮರ (Moon Tree)ಗಳ ಕುರಿತು ಒಂದಷ್ಟು ಆಸಕ್ತಿಯು ಹುಟ್ಟಿದ್ದು, ನಿಧಾನವಾಗಿ ಒಂದಷ್ಟು ವಿಚಾರಗಳು ಅಮೆರಿಕದ ಆಸಕ್ತರಲ್ಲಿ ಹಾಗೂ ಕೆಲವು ಶೈಕ್ಷಣಿಕ ಕೇಂದ್ರಗಳಲ್ಲಿ ಚರ್ಚೆಗೆ ಒಳಗಾಗಿವೆ. ಈಗ ಮುಂದಿನ 2026ರ ವರ್ಷದಲ್ಲಿ ಅದರ 50ನೆಯ ವಾರ್ಷಿಕೋತ್ಸವದ ಆಚರಣೆಯಲ್ಲಿ ತಯಾರಿಗಳು ನಡೆದಿವೆ. Moon Tree ಗಳ ಪ್ರಾಯೋಗಿಕ ಕರ್ತೃ ಸ್ಟಾಟ್ ರೂಸ ಅವರು 1994ರ ಡಿಸೆಂಬರ್ನಲ್ಲಿ ತೀರಿಕೊಂಡರು. ಕಳೆದ 2019ರಲ್ಲಿ ಅವರ ಮಗಳು ರೊಸ್ಮೇರಿ ರೂಸ ಮೂನ್ ಟ್ರೀ ಪ್ರತಿಷ್ಠಾನ (Moon Tree Foundation) ಸ್ಥಾಪಿಸಿ ಮುಂದಿನ 2026ರ 50ನೆಯ ವಾರ್ಷಿಕೋತ್ಸವಕ್ಕೆ ಮೂನ್ ಟ್ರೀಗಳಿಂದಾಯ್ದ 50 ಸಸಿಗಳ ಮರು ನಾಟಿ ಮಾಡುವ ಯೋಜನೆಯನ್ನು ಹಮ್ಮಿಕೊಂಡಿದ್ದಾರೆ. ಮೂನ್ ಟ್ರೀಯ ಮುಂದಿನ ಸಂತತಿಯ ಸಸಿಗಳನ್ನು ಹಾಫ್ ಮೂನ್ (Half Moon Tree) ಗಳೆಂದೂ ನಾಮಕರಣ ಮಾಡಲಾಗಿದೆ.
2005ರ ನಂತರ ನಾಸಾ (NASA)ದ ಡಾ. ಡೇವಿಡ್ ವಿಲಿಯಮ್ಸ್ ಆಸಕ್ತಿ ವಹಿಸಿ ಅದರ ಆರ್ಕೈವ್ನಲ್ಲಿ ಸದ್ಯಕ್ಕೆ ಬದುಕಿ ಉಳಿದಿರುವ 63 ಮರಗಳ ಮಾಹಿತಿಯನ್ನು ಒಂದೊಂದೇ ವೆಬ್ ಪುಟಗಳಾಗಿಸಿ ಸಾರ್ವಜನಿಕವಾಗಿ ಮುಕ್ತವಾಗಿಸಿದ್ದಾರೆ. ಮಂಟ್ಗಾಮರಿಯಲ್ಲಿ ನಾನು ಕಂಡ ಮರದ ಫೋಟೊಗಳನ್ನೂ ಹೀಗೆ ಅವರಿಗೆ ಕಳಿಸಿದ್ದರಿಂದಲೇ ಅವರಿಗೂ ಆ ಮರದ ಈಗಿನ ಪರಿಸ್ಥಿತಿಯು ತಿಳಿದದ್ದು. 2019ರಲ್ಲಿಯ ನನ್ನ ಸಸ್ಯಯಾನದ ಕುತೂಹಲವೇ ಅಮೆರಿಕದಲ್ಲೂ ಕಂಡ ಗಿಡ-ಮರಗಳ ಪರಿಚಯವನ್ನು ಅರಿಯಲು ಮಾಡಿಕೊಂಡ ಆಸಕ್ತಿಯು ಇಷ್ಟೆಲ್ಲಾ ವಿವರಣೆಯ ಕಥನಕ್ಕೆ ಕಾರಣವಾಯಿತು.
ನೂರಾರು ಗಿಡ-ಮರಗಳ ಕಥನಗಳ ಸಸ್ಯಯಾನ (ಲಿಂಕ್ ನೋಡಿ https://bit.ly/3k6Fxt7 ) ದ ಆರಂಭವು ಸ್ವರ್ಗದ ಮರ (Indian Paradise Tree) ದಿಂದ ಆಗಿತ್ತು. ಮುಂದೆ ನಾವು ದಿನವೂ ತಿನ್ನುವ ತಾಟಿನಲ್ಲಿ ಕಾಣುವ ಸಸ್ಯಗಳ ಪ್ರೀತಿಯು ಸ್ವಾದ ಹಾಗೂ ಸುಗಂಧಭರಿತವಾದ ಹೂ-ಹಣ್ಣುಗಳ ಮೂಲಕ ನೂರಾರು ಪ್ರಬಂಧಗಳಾಗಿ CPUS ನ ವೆಬ್ ಪುಟದಲ್ಲಿ ದಾಖಲಾದವು. ಅವೆಲ್ಲವನ್ನೂ ಮೇಲಿನ ಲಿಂಕ್ನಲ್ಲಿ ಎಲ್ಲವನ್ನೂ ಓದಬಹುದು. ಅವುಗಳೆಲ್ಲವುಗಳ ಪ್ರೀತಿಯು ಚಂದ್ರಯಾನಿ ಮರದ ಪರಿಚಯ ತರುವುದರ ಬಗ್ಗೆ ಯಾವುದೇ ಸುಳಿವನ್ನೇನೂ ನೀಡಿರಲಿಲ್ಲ. ಇದೀಗ ಅದರ ಪರಿಚಯದ ಜೊತೆಗೆ ಅಮೆರಿಕದ ಚರಿತ್ರೆಯ ಭಾಗವಾಗಿರುವ ವೆಬ್ಪುಟಗಳಲ್ಲಿ ಒಂದು ಸಣ್ಣ ಗುರುತನ್ನು ಕಂಡ ಸಂತೋಷವನ್ನು ತಂದಿದೆ.
ನಮಸ್ಕಾರ
ಡಾ. ಟಿ.ಎಸ್. ಚನ್ನೇಶ್
ಮಾಹಿತಿ ಪೂರ್ಣವಾಗಿದೆ ಸರ್ ಧನ್ಯವಾದಗಳು